NugV
* ನಾನು ಬರಲೆ *
ಆಶೆಗಳ ಕೊಂಡವರೆ ಆಗಸದಿ
ನಡೆದವರೆ ದೇಶಾಂತರಕೆ
ನಾನೂ ನಿಮ್ಮೊಂದಿಗೆ ಬರಲೆ /
ಏಣಿಯ ಏರಲು ಓಣಿಯ
ಮಕ್ಕಳಿಗೆ ಯಾಕೆಲ್ಲ ನೆಲವು
ಕನಸಿನ ಏಣಿ ಏರಿ ಬರುವೆ/
ಲೋಹದ ಹಕ್ಕಿಯ ಮೇಲೆ
ಮೋಹದ ರೆಕ್ಕೆಗಳ ಕಟ್ಟಿ
ನಡೆದಿರುವದಾದರೂ ಎಲ್ಲಿಗೆ/
ಬಾಂಬುಗಳ ಬಿತ್ತಿ ಭರವಸೆಯ
ನಂಬುಗೆ ಕಿತ್ತು, ಪ್ರೀತಿಯ ಸುಟ್ಟು
ತುಂಬಿಕೊಂಡು ಹೋಗುವುದೆಲ್ಲಿ /
ಬಿಟ್ಟು ಹೋಗಲು ಉಳಿಸಿದ್ದೇನು
ಕೆಟ್ಟು ಹೋಗುವ ತೆಂಗಿನ ಚಿಪ್ಪು
ಬಿಟ್ಟರೂ ಮನಯಲ್ಲಾ ಕೊಳಕು/
ರೆಕ್ಕೆಗಳನು ಕಟ್ಟಿರಿ ನಮಗೆ ಒಮ್ಮೆ
ಚುಕ್ಕೆಗಳ ಮುಟ್ಟಿ ಚಂದ್ರಮನ
ಮೆಟ್ಟಿ ಕುಣಿದಾಡಲು ಬರವೆ/
ಮನೆಪಾಠ ಒಂದು, ಶಾಲೆಗಳ
ಸಹವಾಸ ಪಾಠ ಇನ್ನೊಂದು
ಸಹಜತೆ ತಿಳಿಯದೆ ನೊಂದೆ /
ಅಪ್ಪನ ಕನಸು ಉಪ್ಪರಗಿ ಮೇಲೆ
ಸಪ್ಪೆಯಾಗಿದೆ ಶಾಂತಿಯ ಕಳೆಯು
ಹೊತ್ತಿ ಉರಿದಿದೆ ಬೆಂಕಿಯ ಮಳೆ
No comments:
Post a Comment