ಬಾಡಿದ ಭೂರಮೆ

ಬಾಡಿದ ಭೂರಮೆ


ಬಾಡಿದ ಭೂರಮೆಯ ವದನ
ನೋಡಬಾರದೆ ಒಮ್ಮೆ

ಇರಳು ಕತ್ತರಿಸುವ ಸೂರ್ಯನ ಸೃಷ್ಟಿಸಿ
ಬೆಳಗು ಕಾಣಲು ಬಯಸಿದವರು ನಾವು

ಮಂಗಳನಂಗಳಕ್ಕೆ ಕಾಲು ಚಾಚಿ
ಕೆಕೆ ಹಾಕಲು ಬಯಸಿದವರು ನಾವು

ಹರಿಯುವ ನದಿ ಕಟ್ಟಿ
ಬಡವರ ಬದುಕು ಮೆಟ್ಟಿ
ಮ್ಯುಸಿಯಂನಲ್ಲಿಟ್ಟು ಹಣ
ಕೊಟ್ಟು ನೋಡಿದವರು ನಾವು

ಹಸಿರು ಶಾಲು ಸರಿಸಿ
ಎಲ್ಲೆಲ್ಲೊ ತಾರಸಿ ಪಸರಿಸಿ
ಉಸಿರನ್ನೆ ಕತ್ತರಿಸಿ
ಎಸಿ ಬಯಸಿದವರು ನಾವು

ಬಾಗಿ ಬೆಂಡಾದರು
ಬಿಡಲೊಲ್ಲೆವು ನಾವು
ಬಾಂಬುಗಳನ್ನು ಬಿತ್ತಿ
ಭತ್ತದ ಬೆಳೆ ಬಯಸಿದವರು ನಾವು

ಇಳೆಯನ್ನು ಕೊಳೆ ಮಾಡಿ
ಕೊಳೆ ತೆಗೆಯುವ ಯಂತ್ರವ ಮಾಡಿ
ತಂತ್ರಜ್ಞಾನ ಪ್ರಗತಿ ಎಂದು ಬೀಗಿದವರು ನಾವು

ಸತ್ತ ಹೆಣಕೆ ಸೃಂಗಾರಕ್ಕೆ
ಸಾವಿರ ಸಾವಿರ ಕೋಟಿ
ಹೆತ್ತವರನ್ನು ನೋಡದವರು ನಾವು

ಭೂತಾಯಿ ಮೈ ಕೊಡವಿದಾಗ
ಒದ್ದಾಡುವವರು ನಾವು