* ಕಟ್ಟುವೆವು ನಾವು *

ಕಟ್ಟುವೆವು ಕನಕ ಕಟ್ಟಿದ 

ಕನಸಿನ ನಾಡೊಂದನು /

ಮನುಕುಲದ ಬೀಡೊಂದನು

ವರ್ಗವಿಲ್ಲದ ವರ್ಣವಿಲ್ಲದ  

ಸ್ವರ್ಗದ ನಾಡೊಂದನು//

ಬಸವಕಲ್ಯಾಣ, ಬಾಡದ 

ಶರಣ ದಾಸರ ಸಂತತಿಯ

ಮಾನವತೆ ನಾಡೊಂದನು/ 

ಹೊಸೆದು ತೀಡಿ ಕಟ್ಟುವೆವು

ಬಸವ ನಾಡೊಂದನು//

ಬುದ್ಧ ಬಸವ ದಾಸ ಶ್ರೇಷ್ಠ 

ಶುದ್ಧ ಭಾವದ ನಾಡೊಂದನು/

ರವಿ ಕಾಣದ ಜಗವ ಸೇರಿ

ಜಿಡ್ಡು ತೊಳೆದು ಕಟ್ಟುವೆವು 

ರಾಗಿಯ ನಾಡೊಂದನು //

ವಿಜಯನಗರ ವೈಭವ ಮತ್ತೆ 

ಮರಳಿ ಅರಳುವ ನಾಡೊಂದನು/

ಹರಿ ಕೃಷ್ಣ ನಾಮ ಸ್ಮರಣೆಯ 

ದಾಸ ಸಾಹಿತ್ಯ ಸಂಭ್ರಮದ 

ಸಂಗೀತ ನಾಡೊಂದನು//

ಕದವಿಲ್ಲದ ಕದನವಿಲ್ಲದ

ಶಾಂತಿ ಸಮೃದ್ಧಿಯ ನಾಡೊಂದನು/

ಭ್ರಾಂತಿ ಮೀರಿದ, ಆಧ್ಯಾತ್ಮದ 

ಅನುಭೂತಿಯ ಅಮರತ್ವದ 

ಸಾಮರಸ್ಯದ ನಾಡೊಂದನು//

ಬಸನಗೌಡ ಗೌಡರ

ಉಪನ್ಯಾಸಕರು ಗುಳೇದಗುಡ್ಡ