* ಕೋಟೆಕಲ್ ದಿಡಗು *

ಗುಳೇದ - ಗುಡ್ಡದ ನೆತ್ತಿಯ ಮೇಲೆ

ಬಿತ್ತು ಮುತ್ತಿನ ಹನಿಯು। 

ಎತ್ತ ಸಾಗವುದು ಗೆಳೆಯ 

ಉತ್ತರಕಿಲ್ಲ ದಾರಿ ॥

ಮತ್ತೆ ತಿರುಗಿದಳು ವೈಯಾರಿ

ಪಶ್ಚಿಮ ದಿಕ್ಕಿಗೆ ತೊರೆಯಾಗಿ॥

ಗುಳೇದಗುಡ್ಡದ ಗೆಳೆಯ 

ಕೋಟಿಯ - ಕಲ್ಲಿನ ಕ್ವಾರಿ.

ಹತ್ತಿ ಇಳಿದಿದೆ ಗುಡ್ಡದ ವಾರಿ।

ಬಿತ್ತು ಲಲನೆ ಜಲಪಾತ ಹಾರಿ॥

ಹಾವಾಗಿ ಹರಿದು, ನವಿಲಾಗಿ ಕುಣಿದು

ಕವಲಾಗಿ ಸುರಿಯುತಿದೆ ದಿಡಗು।

ಕಾಣಬೇಕು ಗೆಳೆಯ, ಏನಿದರ ಬೆಡಗು ! ।

ಕಣ್ಣಿಗೆ ಹಬ್ಬ ನಡೆದವರಿಗೆ ದಿಬ್ಬಣ।

ಕಾಯ್ದವರಿಗಿಲ್ಲ ಕಾಣುವ ಭಾಗ್ಯ ॥

ಮತ್ತೆ ಕಾಣಲು ಬೀಳಬೇಕು 

ಮುತ್ತಿನ ಮಳೆಯು।

ಇವಳು ಕೋಟೆಯ "ಕಲ್ಲಿನ ರಾಣಿ"

ಗುಳೇದಗುಡ್ಡದ "ಮಹಾರಾಣಿ"।

ಬಂದಾಗ ಮಿಂದು, ಜಿಗಿದಾಗ ಕುಣಿದು

ಬೆರೆಯಬೇಕು ಗೆಳೆಯ॥