* ಅಧಿಕಾರ ಮೌನ *

ಅಳೆದು ತೂಗಿ ಮೌನದಲಿ ಹೊಲಸು 

ಮರೆಮಾಡಿ ಮರೆಯಬೇಡ ಮೂಢ

ಹುಳವಾಡಿ ಕೊಳೆತು ತೇಲಿತು ಕೇಡು

ಬೆಳಕಿಗಿಲ್ಲ ಬರವು ಅದು ರವಿ ಹಾಡು//

ಬೆಕ್ಕಿಗೂ ಕೊರಮರ ಬಲೆಯ ಭಯ 

ಸೊಕ್ಕಿ ನಡೆದರೆ ಅದು ಉಕ್ಕಿದ ಸಾರು 

ಲೆಕ್ಕ ವಿಡದೆ ಬಿಡುವನೇನು ಮಹಾಶಿವ

ಪಕ್ಕೆಲಬು ಮುರಿದು ಕಕ್ಕಿಸದೆ ಬಿಡನು//

ಅಧಿಕಾರ ಮೂರುದಿನದ ಸಂತೆ ಕಂತೆ

ಎತ್ತಿ ಮೆರೆದವರ ಬಾಳು ಸದಾ ಹಸಿರು

ಎತ್ತದೆ ಮೆರೆದವರ ಕತ್ತು ಬರಿ ಮೇಲು  

ಸತ್ತ ಮೇಲೂ ಕಾಡುವುದು ಗರ್ವ ಫಲ//

ಅಣಬೆ ಆಯುಷ್ಯ ಅಲ್ಪ, ಆಹಾರದ

ಮನೆ ಸೇರಿದ ಮರುಗಳಗೆ ಅಮೃತ

ಅರಿಯದೆ  ಮೆರೆದರದು ಕಾಣುವ ಕಂಬ

ಬರಿ ಹುಳಗಳೆ ಸೇರುವುವು ಮೈತುಂಬ //

            ಬಸನಗೌಡ ಗೌಡರ