* ಅಳಿದಿಲ್ಲ... ಬೆಳೆವೆ *

ಒಂದೊಮ್ಮೆ ಮುಗಿಲೆತ್ತರಕೆ 

ನಳಿನಳಿಸಿ ನಾ ಮತ್ತಿನ ಬೆಳೆ. 

ಸಿಹಿ ತುಂಬಿದ ರಸಭರಿತ  

ಸಡಗರದ  ವಯ್ಯಾರದ ಬಾಲೆ.

ಮೈತುಂಬಾ ಬಾಲ ...

ಬಾಗಿಲಿಗೆ ಆಗಿದ್ದೆ ದೀಪಾವಳಿಯ ತೋರಣ.

ಮಗದೊಮ್ಮೆ ಸಂತೆ ಮುಗಿಸಿದ 

ಸಂತನ ಯಾತ್ರೆಯ ಅಂತಿಮ ಆಭರಣ .

ಶಕೆಯಾದರೆ ಬೀಸುವ ಚಾಮರ 

ಇಲ್ಲ ಬಡಿವಾರ ! ತವರ ಪ್ರೀತಿಗೇನು ಬರ ?

ಬಂತೊಮ್ಮೆ ಬಹು ದೂರದಾ 

ರಕ್ಕಸನ ಸಂಹಾರ  

ಬೇಕಂತೆ ಅವರಿಗೆ ಕತ್ತರಿಸಿ 

ಸಿಹಿ ಮುಕ್ಕುವ ಅವಸರ. 

ಮುತ್ತಿಟ್ಟ ಆ ದಿನ ಹೆತ್ತವರ ಪ್ರೀತಿ .

ಸುತ್ತ ತಿರುಗಿ ಮತ್ತು ಏರಿತೈ ಮುಗಿಲೆತ್ತರ 

ಎತ್ತಲೋ ಬಂತು ತಂಡ 

ಕತ್ತರಿಸಿ ಎತ್ತಿ ಮೇಲಿಟ್ಟು 

ಸುತ್ತಿ ಕಳಿಸಿದರು ಬಹು ದೂರ 

ಹಿಚುಕಿ ಹಿಂಡಿ,ಹೊಸಕಿದರು....

ನಾನಾದೆ ಸಿಪ್ಪೆಯ ತುಂಡು.

ಅವಡುಗಚ್ಚಿ ಬಿಗಿಹಿಡಿದೆ ತುಸು 

ತವರಿನ ಕಿಸುನಗೆಯ ಪ್ರೀತಿಗೆ ಒಪ್ಪಿ.

ಮರೆಯುವದು ಹೇಗೆ ?  ಮೈದಡವಿದಾ ಪ್ರೀತಿ.

ಕಾಲು ಕಿತ್ತಿಲ್ಲ ನೆಲೆ ಇದೆ,ಮತ್ತೆ ಮೇಲೇಳುವಾಸೆ 

ಮೈದಡುವವರ ಮಮತೆ ಹಿಡಿವಾಸೆ 

ಮೇಲೆದ್ದು ನಲಿವಾಸೆ ತಲೆಬಾಗಿ 

ಅಳಿದುಳಿದ ಕಬ್ಬು ಕುಳೆ ನಾ ಬೆಳೆದು 

ಸಿಹಿಯಾಗುವೆ ಸಹಿಸಿ.