* ಮರಳಿ ಬಂತು ಮೇ... *

* ಮರಳಿ ಬಂತು ಮೇ... *

ಮತ್ತೆ ಮರಳಿ ಬಂತು ಮೇ 

ಹೊತ್ತು ತರಬಹುದು ಆಶ್ವಾಸನೆ 

ತುತ್ತು ನೀಡಬಹುದೆ ಈ ಹೊರೆ

ಸತ್ತ ಮೇಲೆ ಸುತ್ತಿ ಬಂದರೇನು ಫಲ 

ನಿತ್ಯವೂ ಬೆಲೆ ಬರಲಿ ಗೆಳೆಯ |

ಬಿಳಿ ನೀಲಿ ಕೂಲಿಗಳ ಬೆಲೆ ಬೇರೆ ಮಾಡಿ

ಕವಲು ದಾರಿಯ ತೆವಲು ಬೇಡ 

ಬೆವರಿಗೂ ಬೆಲೆ ಇರಲಿ ಗೆಳೆಯ 

ಬರಿ ಬಿಳಿಯದೆ ಹೊಳೆಯದಿರಲಿ

ದೇವರಾಗಲಾರೆವು ಗೆಳೆಯ ! 

ಬಿಸಿಲು ಗಾಳಿ ಬೆನ್ನಿಗಂಟಿಸಿ 

ಹಸನು ಮಾಡುವೆವು ಕೆಸರು 

ಹೇಸಿಗೆಯ ಹೆದರುವುದು 

ಹೊಸದಾರಿಗೆ ಮುದುರಿ 

ತುಸು ಕರುಣೆಯೂ ಇರಲಿ ಗೆಳೆಯ |

ಇಟ್ಟಿಗೆಯ ತಟ್ಟಿದವರು 

ಸುಟ್ಟು ಪೋಣಿಸಿದವರು 

ಗಾರೆಯಿಟ್ಟು ಕಟ್ಟಿದವರು  

ಕಡೆಗೆ ಮರೆಯಲ್ಪಟ್ಟವರು 

ಪಟ್ಟವೂ ಇರಲಿ ಗೆಳೆಯ !

ಕೆಸರಾದ ಕೈ ಮೊಸರಾಗಬೇಕು

ಉಸಿರಿರುವಾಗಲೆ ಬಾಳು 

ಹಸನಾಗಬೇಕು ಗೆಳೆಯ  

ಅಸನ ವಸನಗಳು ಸಿಗದ  

ಕನಸು ದೂರಾಗಬೇಕು ಗೆಳೆಯ |